Statuty Bursy Prawników (Długosza) Uniwersytetu Krakowskiego z 1485 r. z dodatkami z lat 1492–1579.
Rękopis Biblioteki Kórnickiej, sygn. 802, k. 29v-30v
Odczyt: Marcin Baster
Tercia conclusioa
Anno Cristi 1501. XIX. Novembris in rectoratu venerabilis et egregii viri Mathie de Miechow, artium et medicine doctoris. In Bursa Canonistarum venerabilis ac egregius Petrus de Ilkusch magister artium et, doctor iuris canonici, senior prefate Burse Canonistarum in Cracovia adiudicatus est laboribus, lectionibus in collegio et actibus in ipsa bursa disputandis, secundum privilegium erectionis collegiature pro seniore, et conclusionem per universitatem factam, in actis et conclusionibus universitatis descriptam, sub rectoratu eximii ac venerabilis domini Valentini de Ilkusch, sub penis ibidem contentis et expressis privacionis et destitucionis collegiature, senioratus Burse Canonistarum et altaris super hoc dotati per dominum Nicolaum de Coprzywnycza, [k. 30r] plebanum in Xyaschnicze. Item adiudicatum est, ut carbana tenentur per seniorem burse, consiliariis tenentibus et servantibus claves carbane. Quodque senior in carbanam ponat [.....]b penas a studentibus transgredientibus et ceteris inhabitatoribus extractas in presentia consiliariorum post sufficientem pecunie computacionem, et quod amplius private non imponeretur quidquam in prefatam carbanam. Item mores inhabitancium corrigantur per seniorem burse, non admitendo eisdem qualescunque insolencias et adinvenciones contra bonos mores, ut non ingrederentur tabernas et studiosos ne impedirent, strepitum et clamorem ne facerent, de nocte ut non exirent, post tertiani noctis statim iuxta consuetudinem aliarum bursarum domum claudendo, in Ieme, in estate cicius. Si quis tamen inhabitantium veniret post clausionem, intromitatur per seniorem usque ad unum quartale hore, et non ultra. Clavem a domo et eius hostio nemo habeat preter seniorem. Mulieres non introducantur, nec ingredi permittantur ibidem, quoniam per huiusmodi boni mores depravantur et honestas domus polluitur ac in ignominiam detruditur. Amplius etiam senior non teneat in suis habitacionibus aliquos inhabitantes censum et solucionem pro seipso extrahendo et usurpando. Quod in cameris moretur quilibet inhabitator ad hoc deputatus, in una duo, ad minus unus perseverans, ubi, eciam necessitas veniret senior cederet de habitacione ex opposito minoris, stube senioris locata propter bonum universitatis augendum quemadmodum cedere debet. Quia camera illa duntaxat in favorem persone venerabilis eximiique domini Joannis de Wladislawy tunc senioris prefate Burse Canonistarum concessa fuit tempore rectoratus venerabilis ac egregii domini Joannis de Stanischevicze facta convocacione 1493. Nam sufficiunt pro seniore testudo, stuba maior supra testudinem et camera dicta tenebrosa et celarium minus testudinatum. Item duo consiliarii pro tempore electi recipiant et realiter tollant camerales ab inhabitantibus, sub testimonio integre procuratori universitatis reddendo et totaliter tradendo. Item senior burse tempestive puta in estate lignae pro bursa comparet et quanto expedicius et levius poterit emat, tempora frigida et cariora non expectando. Item rogatus et monitus est dominus doctor Petrus de Ilkusch, senior [k. 30v] burse, per magistrum Joannem de Ostrzeschow notarium publicum, ut lectiones et actus continuaret secundum formam privilegii et conclusionis universitatis predicte. In hac re confecta ut premissum est sub pena expressa privacionis altaris, collegiature et senioratus.